ياترى ايش يعني حب
سؤال سأله كثير
وكلهم يسألوا وفي نفس الوقت يجاوبوا
تعرف ليش ؟
لانهم جربوا الحب وذاقوا شي من الاثنين يا اما حلاوته او عذابه
الحب ماعنده حل وسط ياهنا وسعاده وفرح او عذاب ودموع واحزان
بس نرجع نقول ايش يعني حب
خلينا نقول ان الحب كلام .. بس في ناس تقول لاهو مو كلام هو اعظم من كده مع انه اعظم شي في الحب هو الكلام والمناقشه فيه حتى هي اسمها كلمة احبك
يعني البنت ممكن تقول نفسي يقلي احبك والرجال نفس الشي تلقاه يقول نفسي اسمع احبك
يعني تقول ويقول واسمع يعني كلام
طيب اذا قلنا ان الحب ماهو كلام لان البعض يقول انه افعال وممكن الانسان يعبر عنه بأفعاله .. طيب احنا ممكن نسوي اشياء واللي قدامنا مايحس فيها انها حب .. صح ولا لأ ؟
طيب اذا الحب مو كلام ولا افعال .. لان في ناس تقول الحب احساس
بس كمان في ناس تختلف في احساسها .. ممكن الواحد يفهم غلط من الشخص اللي قدامه وهذا لانه حساس زيادة وممكن الواحد مهما سوى اللي قدامه مايحس فيه لانه احساسه معدوم حبتين ..
فأنا بالنسبه ليا الحب عبارة عن كلام وافعال واحساس وكمان اقدر اقول ان الحب ماله تفسير .. يعني الحب مو افعال ولا اقوال ولا احساس .. الحب اكبر واعظم من ان احنا نحصره في نطاق هالاشياء ..
كلن يفسر الحب اللي يعيشه حسب الشخص اللي يعيشه معاه وحسب كيف يحبه والبيئه اللي عايش فيها
انا من رأيي ان الحب زي الحياة الاثنين يبدأوا بحرف الحاء
الحب عندي يعبر عن قلب ينبض .. عن جسم تعبان وهمدان .. عن عقل مشلول عن التفكير من كثر التفكير .. عن اذن ماتسمع الا كلمة الحب .. عن يد حنونه وعين خجوله وعن اقدام ماتمشي الا في طريق الخيال والاحلام
الحب عبارة عن شوق ووله عن تفكير وبال مشغول عن مجموعة مشاعر مانعرفلها اول من آخر .. عن خوف وطمأنينه .. عن فرح وحزن .. عن ابتسامه ودموع .. عن راحه وتعب وحلم وواقع وكلام وصمت ..
الحب مو بس يتملك قلب الانسان .. الحب يتملك قلبه وعقله وكل عصب في جسمه وكل عضو ينبض فيه ..
فكر معايا شويه
.. ايش يصير لما تكلم اللي تحبه وتشوفه قدامك بأيش تحس ؟
ايش يصير لو عرفت انه خانك ؟
وايش يصير لو عرفت انه يحبك ؟
ايش يصير لو حسيت انه بيرحل عن عيونك وماعاد تشوفه ثاني ؟
ايش يصير لو حبيبك لمس يدك ؟
وايش يصير لو بعد يدك عن يده ؟
تلاقي احساسك معاه في كل لحظه تعيشها معاه يتغير كل ثانيه احساس شكل
مرة حيرة ومرة غيرة ومرة تحبه وتجري عليه واحيانا تبعد عنه خوف ان الزمان يبعدك عنه
في شي كمان مرة غريب في الحب
انه حبيبك اي شي يسويه اذا هو مافسره انت تفسره غصب عنك حسب مزاجك وانت تعيش مع مزاجك ومرة تصيب ومرة تخيب
ترى الحب متعب .. ورغم كده هو قمة الراحه
مين ممكن يعيش من غير حب
طيب برضه كان في سؤال
ايش هي انواع الحب ؟
انا من رأيي ان الواحد يحب ربه .. ودينه .. ويحب اهله وناسه وقرايبه .. الواحد يحب دنيته وحياته ولازم يخاف عليهم .. طيب احنا ليش دايما على الحب لشخص واحد دام فيه كثير اشياء نقدر نحبها ؟
يمكن لانه يكون دخيل على الاشياء هذه !!
يعني اقصد انه الاشياء الثانيه الواحد يحبها ويخلصلها بالفطرة لكن هذا الشي يكون شي جديد عليها
ودايما الجديد يكون له معزة خاصه وخصوصا اذا كان غريب
بس تعرفوا اكثر شي يضايقني في الحب انه مو انت تختار اللي تحبه .. قلبك هو اللي يختاره تخيلوا لو انتوا اللي تختاروا اللي تحبوهم .. تعتقدوا راح تعيشوا نفس الجو ؟
انا حبيت اتكلم شويه عن شي بخاطري .. واتمنى تشاركوني اذا في مشاركه .. وعاد السموحه اذا في اخطاء املائيه لان الكتابه عشوائيه
في شي اخير حابه اقوله
ان اول حرف من الحياة وآخر حرف من القلب .. تصير كلمة حب
اتمنى يكون حاز على اعجابكم
الأحد يونيو 15, 2008 5:23 pm
